May tatlong bagong batas ang pirmado na ni Pangulong Ferdinand “Bongbong” Marcos Jr. na inaasahang pakikinabangan ng mayoryang Pilipino.
Ayon kay House Speaker Ferdinand Martin Romualdez ay malaking tulong ito sa lahat ng mga Pilipino.
Ang bagong batas na kakapirma lang ng Pangulo ay ang pagbasura sa patakaran sa eskuwelahan na “no permit, no exam”.
Malaking tulong ito sa mga mag-aaral lalo na ang mahihirap na kadalasan ay naaantala ang pagbabayad ng matrikula at hindi makakuha ng permit para makapag-exam.
Ayon kay Speaker Romualdez, magbibigay daan ang bagong batas para sa patas na access sa edukasyon ng lahat ng mga Pilipino anuman ang katayuang pinansiyal.
Ang pangalawang bagong batas ay ang New Philippine Passport Act na siyang magbibigay ng kaginhawahan sa mga special na mamamayan sa bansa na nagnanais kumuha ng pasaporte.
Sinabi ni Speaker Romualdez na ang mga buntis, senior citizens, people with disabilities, at mga menor de edad ay maaaring maghain ng passport application online na walang hassle at magiging komportable ang ating mga nabanggit na kababayan mula sa special group na ito.
Ang ikatlong bagong batas sa ilalim ng Marcos administration ay ang Philippine Salt Development Industry Act na siyang magpapasigla sa asinan sa bansa.
Inaasahang lalawak at lalago ang produksiyon ng asin sa bansa na maaaring mag-export pa ng nasabing produkto.
Ito’y dahil sa mabilis na pagkilos ng dalawang kapulungan ng Kongreso sa pamumuno ni Speaker Romualdez.