Naglunsad ng nagbabagang 6-0 atake ang University of Santo Tomas sa pangunguna ni Angeline ‘Angge’ Poyos upang yanigin ang defending chjampion De La Salle University, 25-18, 25-23, 14-25, 16-25, 15-12, sa harapan ng 12,240 miron sa 86th UAAP 2024 women’s volleyball tourney elims Linggo ng gabi sa SM Mall of Asia Arena sa Pasay.
Iwan sa 9-12 sa fifth set mula sa drop ball ni Lady Spikers setter Julyana Tolentino, hindi natinag ang 20-anyos na rookie outside hitter na isinalpak ang magkasunod na hambalos katuwang si Margaret Banagua at may service ace na si Cassie Carballo tungo sa ikatlong sunod na panalo sa gayung daming salang at solohin ang tuktok.
“Wala nang madaling panalo ngayon, lahat pinaghihirapan talaga especially kaharap mo ang defending champs,” suma ni Golden Tigresses coach Emilio ‘Kung Fu’ Reyes. “Doon naman sa UST, talagang yung motivation nila sobra-sobra pero nung dumating ng third and fourth, biglang na lowbatt na. Again we’re happy kasi nanalo lalo nung fifth set hindi bumitaw kahit ang layo na ng score.”
Umatake ang 5-foot-8 spiker mula Quezon City nna si Poyos ng 22 points mula sa 20 atake at tig-1 ace at block kasama ang limang digs upang ilaglag sa segunda ang DLSU sa 2-1 baraha.
Sumegunda sa kanya si Jonna Perdido ng 24 markers sa likod ng 21 atake at tatlong butata kasama ang limang reception. Kinumpleto ni Banagua ang tatlong manlalarong tumapos ng dobleng pigura sa España-based squad sa iniskor na 11.
(Gerard Arce)