Mga laro ngayon
(Smart Araneta Coliseum)
2 pm – Chery Tiggo vs Strong Group
4 pm – Cignal vs Akari
6 pm – Creamline vs Farm Fresh
Sa malalim na roster, kumpiyansa si Chery Tiggo coach Emilio ‘Kung Fu’ Reyes sa tsansa ng Crossovers sa titulo ng 8th Premier Volleyball League 2024 3rd All-Filipino Conference, aasintahin ang win No. 2 kontra Strong Group sa Day 3 ng eliminations ngayon (Sabado) sa Smart Araneta Coliseum.
Paramdam agad sina new recruits Victonara ‘Ara’ Galang at team skipper Abegail ‘Aby’ Maraño nang walisin ng Chery (1-0) ang bagong saltang Capital 1 Solar Spikers (0-1) noong Martes sa opening ng league’s centerpiece tournament.
Nasa landas ang isa pang newcomer Strong Group (0-1) sa alas-2:00 ng hapon, nasisilip ni Reyes ang bahagyang pag-angas lang ng Athletics na gigil namang rumesbak sa 3-set loss laban sa Petro Gazz (1-0) sa torneong inoorganisa ng Sports Vision.
Kahit mabigat ang hamon sa lineup na may star werpa, tinawag ito ni Reyes na “mabuting problema” habang sinusuri ang pinapakita ng mga balibolista sa training.
“It’s a good problem,” pabirong giit ng Chery bench tactician.
May maasahan siya sa matalentong kampo kaya puno ng tiwala na kinabibilangan nina outside hitters Mylene Paat, Cza Carandang, Cess Robles, Pauline Gaston, Shaya Adorador at Laure sisters – EJ at Eya.
“Somehow, masakit sa ulo, marami kaming outside hitters,” hirit ni Reyes. “Ang magiging gauge namin is kung sino yung 100 percent, sino ang mas maganda ang performance, sino ang pinaka-consistent sa training.”
Pero optimistiko ang Athletics sa pag-angat ng laro nina skipper Dolly Versoza, Angeli Cane, Sheeka Espinosa, Nikkie Baldizanso, Sousan Raslan, Joy Onofre, Andrea Rebleza at Ayumi Furukawa.
Bubuksan din ng defending champion Creamline at Cignal ang mga kampanya kontra Farm Fresh at Akari, ayon sa pagkakasunod.
Mapapanood ang mga aksiyon sA One Sports, One Sports+, league official website (pvl.ph), Pilipinas Live app at RPTV. (Abante TONITE Sports)