Noong nakaraang linggo, pinutakte ng kaliwa’t kanang kritisismo si Vice President Sara Duterte dahil sa labis nitong pananahimik sa gitna ng tumitinding karahasan ng Tsina laban sa ating mga kababayan sa West Philippine Sea. Mas mainit pa sa tag-init ang mga pinupukol na puna ng iba’t ibang sektor sa pangalawang pinakamataas na lider ng bansa.
Hindi natin masisisi ang mga bumabatikos. Nasa katwiran ang kanilang pangangalampag kay VP Sara, na isang reserved army colonel at Philippine Coast Guard auxiliary. Biruin mo yan! Habang tameme at walang imik si VP Sara sa sinapit na karahasan ng mga Filipino frontliners sa Ayungin Shoal, 21 na bansa ang naglabas ng kanilang mga pahayag para kondenahin ang karahasan ng China sa West Philippine Sea. Kasabay nito, naglabas din ng statements ang Foreign Correspondents Association of the Philippines (FOCAP) at mga lokal na mga mamamahayag upang kondenahin ang Tsina sa paratang nito na dinodoktor daw ng foreign at local media ang reporting nila sa West Philippine Sea para siraan diumano ito.
Naging matapang din ang mga pahayag ng ating National Security Council (NSC), National Task Force on the West Philippine Sea, Department of Foreign Affairs (DFA), Department of National Defense (DND), Philippine Navy, Philippine Coast Guard (PCG) at Armed Forces of the Philippines (AFP). Nagsalita rin ang maraming mga senador, at maging si Senator Bato Dela Rosa, na alyado ng mga Duterte, ay napilitang magbigay ng pahayag. Matigas din ang opisyal na pahayag ni President Bongbong Marcos Jr. na nangakong maglulunsad ng mga komprehensibong countermeasures bilang resbak sa patuloy na panghihimasok at karahasan ng China sa ating teritoryo.
Dahil bugbog sarado na si VP Sara sa mga batikos, napilitang dumepensa ang kanyang kapatid na si Davao City Rep. Paolo “Pulong” Duterte. Dahil bihirang-bihira maglabas ng anumang pahayag ang nasabing kongresista, ang kanyang “rare statement” ay mistulang naging indikasyon ng desperasyon ng kanilang kampo na isalba ang reputasyon ni VP Sara. Ayon kay Pulong, hindi raw trabaho ni VP Sara na magsalita sa foreign policy. Hindi naman daw Pangulo si VP Sara at hindi “chief architect” ng ating foreign policy. Sambit pa ni Pulong, ang dapat daw kalampagin ay ang Pangulo, DND at DFA.
Bihira na nga lang magsalita si Pulong, hindi pa niya ginalingan! Hello?!? Lahat ng sinabi niyang opisina na dapat daw tanungin ukol sa WPS ay naglabas ng pahayag upang kondenahin ang tumitinding karahasan ng China sa ating karagatan. Kaya nga binabatikos ang kanyang kapatid dahil siya na lamang ang hindi nagsasalita. Ang labo mo, Cong!
Sinupalpal din si Pulong ni Akbayan Party President Rafaela David. Ayon kay David, hindi kailangan maging President o chief architect ng foreign policy ni VP Sara para magbigay ng pahayag sa WPS. Sambit niya, ang kailangan lamang ni VP Sara ay puso at malasakit para sa ating mga mangingisda at frontliners. Sabi ng lider ng Akbayan, kung tingin ni VP Sara ay hindi niya trabaho na ipagtanggol ang mga Pilipino, mag-alsa balutan na ito at umalis sa kanyang pwesto. Ang anghang! Kung tutuusin, kung pabor naman si VP Sara sa opisyal na foreign policy position ng ating gobyerno sa WPS, madali lamang sa kanya ang magsalita sa nasabing isyu. O baka naman taliwas ang kanyang paninindigan? O mas malala, baka tama ang akusasyon ng marami na gaya ng kanyang ama, tuta si VP Sara ng bansang Tsina?
Ang nakakatawa, habang tahimik na tahimik si VP Sara sa sigalot sa WPS, putak naman ng putak si ex-human rights lawyer Harry Roque ukol sa taksil na kasunduan ni dating pangulong Rodrigo Duterte sa China. Ayon kay Roque, nangako si Digong sa Tsina na hindi magkakaroon ng regular maintenance at repairs ang BRP Sierra Madre, na nagsisilbing tahanan ng ating mga frontliner sa Ayungin Shoal at simbolo ng ating mapayapa ngunit determinadong pagtatanggol ng ating teritoryo. Isa itong katrayduran! Alam ni Digong na kapag hindi nagkaroon ng regular maintenance repairs ang BRP Sierra Madre, tuluyan itong masisira at maglalaho na rin ang ating presensiya sa Ayungin Shoal. Ito ang dahilan sa pasidhi ng pasidhing karahasan ng Tsina sa ating mga frontliner. Si Digong at ang kanyang “gentleman’s agreement” sa China ang salarin. Ngunit imbes na mahiya sa kanilang kataksilan, ipinagmayabang pa ni Roque ang kasunduan. Sinisi rin niya ang mga frontliner na nasugatan sa water cannon ng Tsina. Nangyari raw yon dahil hindi daw sumusunod ang ating mga frontliner sa kasunduan ni Digong at Tsina. Ang tindi ng kapal ng mukha ng mga traydor na ito!
Kaya para saan pa ang pagsusuot ni VP Sara ng military uniform bilang reserve officer (colonel) ng AFP kung pipi, bulag at bingi naman ito sa pandarahas na dinadanas ng ating mga frontliner sa WPS? Para saan pa ang kayang pagiging PCG auxiliary kung hindi niya kayang ipaglaban ang ating mga bayaning coast guards? Kung ako sa AFP, ipapasoli ko kay VP Sara ang kanyang military uniform at hihikayatin itong mag-resign na lamang bilang AFP reservist officer. Alam na natin saan nakasandig ang katapatan ni VP Sara. Ang kanyang patuloy na pananahimik ay pagtangkilik sa Tsina.