Sa larangan ng cruise tourism halos masasabing nag-uumpisa pa lamang ang Pilipinas kumpara sa ibang bansa pero positibo ang ating pagsisimula.
Ito’y dahil nasungkit ng Pilipinas ang parangal na “Best Port Call of 2024” sa 10th Asia Cruise Awards na idinaos sa Jeju Island South Korea nito lamang July 10, 2024.
Noon namang 2023 ay nakuha ng bansa ang prestihiyosong award na Best Cruise Destination in Asia mula sa World Cruise awards.
Ang mga parangal na ito ay bunga ng patuloy na pagsasaayos at modernisasyon ng mga port infrastructure sa buong bansa.
Kaya naman noong 2023, umabot sa 87,000 cruise passengers ang naitalang bumisita sa Pilipinas at ngayong 2024, posibleng umabot pa sa higit 103,000 ang mga cruise passengers ang maging bisita natin. Ipinapakita nitong sumisigla ang cruise ship visits sa ating bansa na lalo namang nagpapasigla sa turismo.
At dahil ito sa mahusay na pangangasiwa ng Philippine Ports Authority. Naiayos ng PPA ang mga pantalan sa bansa gaya ng Currimao sa Ilocos Norte, Salomague sa Ilocos Sur, at mga pangalan ng Maynila, Bohol, at El Nido sa Palawan. Napaganda nang husto ang mga pantalang ito at naibigay ang kinakailangang upgrade ng mga port facility para sa mga daungan ng mga international cruise vessel.
Mahalaga ang ikinasang modernisasyon sa ating mga daungan upang higit na makilala ang Pilipinas bilang pangunahing destinasyon ng paglalakbay-dagat sa Southeast Asia.
Ngunit hindi lamang naman para sa cruise passengers ang ginagawang pagpapaganda ng PPA sa mga pantalan kundi pati na rin sa pangkalahatang karanasan ng mga turista na dumadaan sa mga pantalan.
Noong 25 Setyembre 2023, kasabay ng selebrasyon ng World Tourism Day, inilunsad ng PPA ang #PPAsyalTayo campaign na layong mas maipakilala ang mga tourist destination sa bansa na maaaring marating sa pamamagitan ng mga pantalan na nasa ilalim ng pangangasiwa ng ahensya.
Alam naman ng mundo na mala-paraiso ang ganda ng Pilipinas at mainit na tinatanggap ng ating mga kababayan ang mga turista kaya kung mas papagandahin pa ang mga pantalan natin ay mas magkakaroon ng magandang karanasan ang mga cruise passengers.
Kapag nabigyan natin ng hindi malilimutang karanasan ang bawat dumadalaw na cruise passengers sila mismo ang magkakalat sa ibang nasyon na napakaganda ng kanilang experience dito sa ating bansa at makakakahikayat pa sila ng mas marami pang turista.
Alam naman natin na ang turismo ang nagpasigla sa ekonomiya ng ating bansa noong bumabangon pa lamang tayo sa paghihirap na dulot ng pandemya. Alam din natin na maraming ibinibigay na trabaho sa mga kababayan natin ang turismo.
Malaking potensyal talaga ang turismo para sa pambansang ekonomiya kaya dapat ay suportahan nating lahat ang pinaigting na kampanya ng PPA para mas mapaganda pa ang mga imprastratura sa ating mga pantalan. Sa bawat madadagdag na cruise passengers, dagdag kita ito sa ating mga kababayang nasa industriya ng turismo at dagdag kita rin para sa ating bansa.