Kontra ang Department of Agriculture (DA) sa pagpapatupad ng price cap o suggested retail price (SRP) sa bigas kahit patuloy ang pagtaas ng presyo nito sa mga pamilihan.
“Wala kaming plano na magkaroon ng price cap or SRP kasi may mabigat ding epekto `yan pagdating ng panahon,” pahayag ni DA Assistant Secretary at Spokesperson Arnel de Mesa sa isang news forum sa Quezon City nitong Sabado, Abril 6.
Kabilang ang mataas na presyo ng bigas sa bansa sa mga sinasabing dahilan ng pagsipa ng food inflation.
Base sa ulat ng Philippine Statistics Authority (PSA), umakyat ang inflation rate sa 3.7% nitong Marso mula sa 3.4% noong Pebrero dahil sa pagtaas ng presyo ng mga pagkain tulad ng bigas at karne.
Ang inflation ay ang bilis ng pagtaas ng presyo ng mga bilhin tulad ng pagkain, petrolyo at mga serbisyo.
Ayon sa PSA, umakyat ang food inflation sa 5.6% nitong Marso mula sa 4.6% noong Pebrero.
Aniya, nasa 24.4% ang inflation ng bigas nitong Marso at malapit na ito sa all time high na 24.6% na naitala noong Pebrero 2009 na 24.6%.
Sa kabila nito, sinabi ni De Mesa na bumababa naman kada buwan ang retail price ng bigas.
“’Yung presyo ng bigas bumababa from P52 per kilo last month. Ngayon, nasa P50 to P49 per kilo,” ani De Mesa.
Kinumpirma naman niya ang pagtaya ng PSA na magpapatuloy ang rice inflation hanggang sa Hulyo ngunit magiging normal aniya ito sa Agosto. (Dolly Cabreza)