Iginiit ng Democracy Watch, isang election watchdog, sa Commission on Election – Special Bids & Awards Committee (SBAC) na maging `transparent’ sa mga detalye ng isasagawang ebalwasyon sa Miru voting system.
Hiniling ng nasabing election watchdog sa SBAC na magkaloob ng checklist ng technical specifications at magsagawa ng masusing review sa Miru system kasama ang mga observer.
Layunin ng naturang proseso na matiyak at mabusisi ang lahat ng requirement at ideklara kung may complain o non compliant ang Miru.
Sa ipinadalang liham ng nasabing DW sa SBAC, nagpahayag sila ng pagkabahala sa umiral na live online streaming ng post-qualification proceedings.
Inirekomenda nilang gumawa ng mga hakbang ang Comelec gaya ng pagkuha ng mga propesyunal na broadcast crew para maging mas malinaw ang audio-visual, makita ng publiko at observer, at masundan ang ebalwasyon.
Dapat ring magprisinta ng 6 na requirements ang Miru para makuntento ang publiko at makatiyak ng integridad ng halalan.
Kabilang dito ang estado ng Automated Counting Machine (ACM) bilang prototype o dating ginamit na sistema partikular na sa nakalipas na technical failures sa naganap na halalan sa Democratic Republic of the Congo at Iraq.
Gayundin ang kapabilidad na hindi nagbabago ang audit log para matiyak na walang data alterations, impormasyon sa “ladderization” sa transmission process, klaripikasyon sa kapal ng papel na ginagamit sa ACM, beripikasyon na istriktong sinusunod ang regulasyon ng Comelec para mapigilan ang unrestricted resetting. (Juliet de Loza-Cudia)