Sa pagdiriwang ng Women’s Month nitong Marso, ginawaran ng pagkilala ang labing isang natatanging babae sa Tanza, Cavite na nagmarka sa kani-kanilang larangan.
Isa ang singer na si Jezza Quioge sa mga kinilala sa kauna-unahang ICON: Icel Commendation to Outstanding womeN of Tanza na inorganisa ni Kon. Icel Del Rosario-Morales.
Nasungkit ni Jezza ang ikatlong puwesto sa Tawag ng Tanghalan – Ika-anim na Taon ng noontime variety show na It’s Showtime noong 2022. Kinilala na rin ang kanyang husay at galing sa pag-awit sa ibang bansa.
Sa kabila ng mga nakamit na papuri at parangal, nananatiling mapagkumbaba si Jezza.
Sa kanyang acceptance speech, nagpasalamat ang dalaga sa pagkilalang natanggap sabay pangakong mananatili siyang inspirasyon sa maraming kabataang Tanzeño higit lalo sa mga nangangarap na magtagumpay sa buhay.
Dahil may kaugnayan sa gender equality at inclusivity ang tema ng Women’s Month ngayong taon, isa rin sa ICON awardees ang LGBT member na si Benjamin ‘Tita Benjie’ Cenizal.
Noon pa man, isinusulong na ni Kon. Icel sa bayan ng Tanza ang pagkakapantay-pantay. Katunayan, siya ang tinaguriang ‘Queen Mother’ ng LGBT community sa bayan. Isa siya sa pumoprotekta sa karapatan at kapakanan ng mga kababayan nating kabilang sa LGBT.
Isa pa sa natatanging ICON awardee ang Municipal Health Officer ng LGU Tanza na si Dr. Ruth Punzalan. Malaking papel ang ginampanan niya nitong kasagsagan ng Covid-19 pandemic. Naipabatid niya sa taumbayan ang mga kailangang malaman para masugpo ang pagkalat ng virus. Ipinaalam din niya ang halaga ng bakuna sa mga Tanzeño.
Katuwang ni Kon. Icel sa iba pang programang may kinalaman sa mga babae, bata at kalusugan – si Kon. Sandy de Peralta – Go na isa rin sa ICON awardees. May dalawang dekada na rin siyang nasa government at public service.
Ilan pa sa awardees sina Rosalita Cenizal (Senior Citizen), PSMS Annalisa Flores (Peace and Security), Jhoannalen Tanega (Private Sector), Aleah Mae Tulauan (Student Leadership), Pilita Ner (Hospitality and Food Services), Dr. Barbara Lupisan (Academe), at Gene Audrey Arayata (Youth Empowerment).
Si Cavite Vice Governor Athena Tolentino na kauna-unahang babaeng gobernador sa lalawigan ang nagsilbing Guest of Honor.
Ginanap ang awarding ceremony sa activity center ng The SM City Tanza na dinaluhan ng may isanlibong Tanzeño.
Gaya ng paulit-ulit na sinasabi ni Kon. Icel, BABAE KA! Hindi babae lang.