Nangulit ng triple-double si Kawhi Leonard, may double-double si James Harden at ibinaon ng Clippers ang co-tenants nila sa Crypto.com Arena na Lakers 127-116 sa 78th NBA 2023-24 regular season game Martes ng gabi.
Tumapos si Leonard ng 25 points, 11 rebounds, 10 assists para sa ikalawa niyang career TD. May 23 pts., 10 asts. si Harden. Naka-tig-17 markers sina Paul George, Terance Mann at Norman Powell, 16 kay Russell Westbrook na natanggalan ng kanang sapatos pagtira ng tres sa first quarter.
Nasa injury list si LeBron James (left ankle sprain), sumandal ang Lakers (22-23) sa 27 pts., 10 asts. ni D’Angelo Russell at 26 pts., 12 rebs. ni Anthony Davis. May 12 pts. si Austin Reaves.
Isang beses lang lumamang ng isa ang Lakers sa first quarter, naghabol sa Clippers (28-14) sa buong laro.
Nag-init sa third ang Lakers, kinamada ni Russell ang first 7 points ng quarter, at sa back-to-back 3s nila ni Reaves ay dinikit 92-88.
Pinagitnaan ng 3s ni Westbrook ang goaltending call kay Rui Hachimura, isang tres pa ni Amir Coffey ay pumasok ng fourth ang Clippers tangan ang 106-97 lead.
Inilapit pa ng Lakers sa dalawa sa kaagahan ng fourth, pero minanduhan ni Leonard ang 9-0 run ng Clippers tungo sa 119-108 lead. (Vladi Eduarte)