Ngayong Linggo ng Palaspas nagwawakas ang Apatnapung Araw ng Paghahanda o Panahon ng Kuwaresma at simula ng pagpasok ng Semana Santa o mga Mahal na Araw. Ito ayon Sa Simbahan ang pinakamahalaga at pinakamataas sa mga linggo ng buong taon sapagkat sa linggong ito ginugunita ang Pagpapakasakit, Pagkamatay at Muling Pagkabuhay ng Panginoong HesuKristo na tumatayong sentro ng ating pananampalataya.
Sinisimulan natin ang Semana Santa sa Linggo ng Palaspas bilang paggunita sa pagpasok ng Panginoon sa Jerusalem upang harapin ang Kanyang kamatayan na mauuwi sa Kanyang Muling Pagkabuhay. Itinutuon natin ang ating atensiyon ngayong araw sa matagumpay na pagpasok ng Panginoon sa Jerusalem at ang pagbubunyi ng mga tao na nagsisigawan, “Hosana! Purihin ang dumarating sa ngalan ng Panginoon!”
Ang pagpasok ni Hesus sa Banal na Lungsod ay hudyat ng simula ng ating kaligtasan, ito ang senyal ng simula ng ating kalayaan sa kasalanan! Sa Banal na Misa ipinoproklama natin ang kabuuan ng Pasyon ng Panginoon. Mahaba ang Mabuting Balita tungkol sa Pagpapakasakit ni Kristo (Marcos 25: 1-38), matagal tayong nakatayo bilang paggalang, gayunman kaunting sakripisyo lamang ito kumpara sa ginawa ng Panginoon para sa ating kaligtasan.
Ngayong araw isinasaysay sa atin ang pagpapakababang ginawa ng Panginoon sa Kanyang paghihirap at pagpapakasakit hanggang Siya ay ipako sa Krus at dulot nito ay kamatayan. Wala Siyang pagtutol, walang paghihimagsik, walang anumang reklamo. Tinanggap Niya lahat ng hirap para sa kaligtasan ng bawat isa sa atin. Dito Niya naipamalas sa atin ang dakilang awa at pag-ibig ng Diyos sa sangkatauhan.
Ngayong nasa mga Mahal na Araw na tayo, namnamin nawa natin nang lubusan ang mga pahayag ng Diyos na nagbibigay sa atin ng paggabay upang magawa nating sundan ang mga yapak ni Hesus. Itinuturo sa atin ng Panginoon ang daan patungo sa buhay, tunay na kaligayahan at kalayaan. Huwag nawa nating sayangin ang pagkakataong ito na madama ang dakilang pag-ibig na handog sa atin ng Diyos noong ialay ni Kristo para sa atin ang Kanyang buhay.
Isang pinagpala at mabungang Semana Santa po sa inyong lahat!