Mainit na usapin ngayon ang nabunyag na umano’y anomalya sa pagbebenta ng bigas ng ilang opisyal ng National Food Authority (NFA) sa pribadong traders kaya naman nasa hot water ngayon ang 139 na opisyal at mga tauhan ng ahensiya.
Marami-rami rin itong mga iniimbestigahan ngayon ng Ombudsman at maging ng Department of Agriculture kaya posibleng kakaba-kaba na ang mga nagmaniobra para maibenta ang bigas ng NFA ng palugi umano sa ilang pribadong negosyante.
Bilang panimula, sinuspinde na ng Ombudsman ng anim na buwan ang lahat ng posibleng may kinalaman sa anomalya, at kapag suspendido, walang tatanggaping suweldo ang mga ito mula sa gobyerno.
Kawawa naman ang mga ordinaryong kawani na napabilang sa mga sinuspinde dahil tiyak na magugutom ang kanilang pamilya.
Hindi bale na sa mga opisyal ng NFA dahil mas malaki ang suweldo ng mga ito at posibleng nakapagtabi ng kanilang kita kumpara sa mga ordinaryong manggagawa nila na sapat lang siguro sa kanilang pang-araw araw na pamumuhay.
Hindi naman kasi magagawa mismo ng mga opisyal ng ahensiya ang pagbebenta ng bigas ng hindi inuutusan ang kanilang mga tauhan at ngayon ay nadamay pa sa kamalasan.
Hindi biro ang bintang sa mga sinuspinde kung sakaling may katotohanan ito dahil mismong si Pangulong Ferdinand Marcos Jr. ang nagsabi na hinokus-pokus ang proseso para maibenta ang imbak na bigas ng gobyerno ng palugi.
Mismong ang Presidente ang nagsabi na ginawang short-cut ang proseso sa pagbebenta ng bigas at hindi ito dumaan sa pag-abruba ng NFA Board kaya malinaw na iilan lamang ang nagdesisyon at nagsabwatan umano para maipalabas ang bigas na imbak ng NFA.
Bukod sa ginagawang imbestigasyon ng Ombudsman, mayroong hiwalay na pagsisiyasat ang Department of Agriculture kung saan iniutos ni Secretary Francisco Tiu Laurel ang malalim na pagsisiyasat hanggang noong 2019.
Marami-raming dokumento rin ang kakalkalin ng mga imbestigador dahil pati mga transaksiyon ng NFA bago mag-pandemic ay isasama sa mga bubusisiin ng technical working group na binuo ng DA para mag-imbestiga.
Akala ng publiko nakalos na ang mga gumagawa ng kalokohan sa gobyerno dahil hindi ito pinapatawad noon ng nakalipas na administrasyon.
Linggo-linggo noon ay inaanunsiyo ni dating Pangulong Rodrigo Duterte ang mga nahuhuling tiwali at gumagawa ng kalokohan sa kanyang administrasyon, pero tila may mga natirang latak sa pamahalaan.
Naisip marahil ng mga tiwali na bago na ang administrasyon kaya wala ng sisita sa kanila pero hindi naisip ng mga ito na ang taongbayan na mismo ang nagbabantay sa mga luko-luko sa gobyerno.
Moderno na ang panahon kaya isang pindot na lang ay malalaman ng buong bansa kapag gumawa ng kalokohan at nagsamantala sa kapangyarihan.
Magsilbing babala sana itong pagsuspinde sa 139 na opisyal at tauhan ng NFA dahil kahit hindi pa napapatunayan ang bintang sa kanila, hindi na maaalis ang batik sa kanilang pangalan.
Galingan na lamang ninyo ang pagdepensa sa korte dahil kung hindi totoo ang bintang, ay lalabas din ang katotohanan.
Pero isa lang ang malinaw at dapat tandaan ng mga nasa gobyerno: huwag magpapatukso at maging ganid sa kinang ng kuwarta. Kaya kayo nandiyan ay upang magserbisyo sa tao at hindi para magpataba ng inyong mga bulsa.