Ngayon pa lang, naaamoy ko na na maraming employer ang kinakabahan sa panukalang P100 daily wage increase sa mga minimum wage earner.
Nagsalita na ang Employers Confederation of the Philippines (ECOP) na tutol dito. Maging si Go Negosyo founder Joey Concepcion, nagbigay din ng saloobin sa nasabing isyu.
Sabi ni Concepcion, hindi lahat ng employer ay kakayanin na dagdagan ng P100 ang arawang sahod ng kanilang mga empleyado. Kaya nirekomenda niya na gawing hulugan ito imbes na isang bagsakan. Halimbawa raw, hatiin ang P100 wage increase sa P15, P20, P25 at P40.
Hindi niya nilinaw kung kada taon o kada anim na buwan. Kung apat na taon kasi, parang katulad lang ito ng ibinibigay ng mga regional wage board.
Kung ako ay isang employer, siyempre iisipin ko rin na dagdag ito sa overhead. At para mabawi ito, kailangan tumaas ang kita o kaya ay magbawas ng gastos.
Huling nagkaroon ng legislated wage increase noong 1989. Natatandaan ko ito dahil nagko-cover pa ako noon sa Department of Labor and Employment. Dahil sa Republic Act 6727, itinaas noon ang minimum wage sa P89 mula sa P64.
Sa P25 na umento, nagbanta noon ang ECOP na magkakaroon ng mass layoff. Nagkaroon nga ng tanggalan pero hindi maramihan tulad ng ibinabala. Ang dumami ay ang mga lumalabag sa wage order o yung hindi sumusunod sa itinatakda ng batas.
Matapos ang 35 taon, sinisikap ng Senado na magkaroon muli ng legislated wage hike. Pero hindi lang ang mga employer ang malamig sa panukala, kasama na ang Kamara de Representantes.
Pakiramdam ko, hindi ito tungkol sa laki ng isinusulong na wage hike ng Senado, kundi konektado ito sa word war ng dalawang kapulungan.
May isang kongresista ang nagsabing ang P100 wage hike ay baka raw pagmulan ng mass layoff at pagsasara ng mga negosyo. Narinig ko na ito 35 years ago.
Si DOLE Secretary Bienvenido Laguesma, nagbanta naman na baka magkaroon ng wage distortion sa P100 dagdag sa minimum wage. Ibig sabihin nito, posibleng abutan ng mga minimum wage earner ng mas senior sa kanila na hindi nasasakop ng mga wage order. Sa himig ng kanyang pananalita, parang kontra rin siya sa P100 wage increase.
Nanggaling si Laguesma sa National Conciliation and Mediation Board (NCMB) ng DOLE noon bago naging secretary. Isa sa trabaho niya noon ay makipagharap sa mga employer at empleyado upang hindi humantong sa strike ang hindi pagkakaunawaan. Sa madaling salita, aregluhin ang hindi pagkakaunawaan ng magkabilang panig.
Sana isipin din ng kalihim ang pinagdadaanan ng mga minimum wage earner ngayon kahit na sabihin pang masakit sa bulsa ng mga employer ang P100 minimum wage hike.