Mabuti pa ang Presidente may “hiya.”
Ayon kay PBBM sa panayam ng media “ hiyang-hiya “ siya na hihinto ang trapik para bigyang daan ang kanyang convoy.
Ang pahayag ng Pangulo ay ginawa matapos umani ng batikos ang helicopter ride ng First Couple para manood ng ‘concert’ sa Philippine Arena sa Bocaue, Bulacan kamakailan.
Sa totoo lang hindi dapat ito maging isyu.
Ang nakataya dito ay ang seguridad ng Presidente ng bansa. Malaking kahihiyan sa Presidential Security Group (PSG) at iba pang security forces kung may mangyari sa Pangulo dahil hindi nila ginawa ang kanilang trabaho.
Marahil ikinonsidera ng PSG ang opsyon ng elevated land travel mula Nagtahan Skyway hanggang Philippine Arena Exit sa NLEX, subalit sabi nga ni PBBM wala siyang mukhang maipakikita kung pahihintuin ang mga motorista para lamang makadaan ang kanyang “ convoy.“
Samakatwid “may hiya” ang Pangulo.
Hindi katulad ng araw-araw nating nararanasan sa kalsada, ang daming ‘feeling entitled’ may mga hagad at hawi boys meron pang mga ‘back-up vehicle’ na sobrang ingay ng wang-wang.
Kung ang Pangulo ay may “hiya,” meron ding mga “walanghiya” at daig pa ang Presidente kung magpahinto ng mga motorista sa kalsada.
Mga public servant kung tagurian subalit inaabuso ang taglay na kapangyarihan – hindi natin nilalahat.
Sana naman tablan ang mga “ feeling entitled “ matapos sabihin ng Pangulo na nahihiya siya na maging “cause” ng trapik.
Muling inulit ng Presidente sa ‘kick-off rally’ ng Bagong Pilipinas ang babala sa mga ‘umaabuso sa kapangyarihan.’
Paano mapapasunod ang mga tao sa mga batas trapiko kung ang mga pasaway mismo ay mga nasa pwesto at taong gobyerno?
Napaguusapan din lamang ang lansangan at hindi naman sa gusto lang nating mamuna. Subalit nais lamang nating maunawaan at malaman para saan ba talaga ang “ highway patrol group” ng Philippine National Police?
Ayon po sa search engine na google heto po ang function ng PNP HPG: Ang Highway Patrol Group ay isang yunit ng pulisya sa ilalim ng Philippine National Police (PNP) na nangangasiwa sa mga krimen na may kaugnayan sa trapiko at pamamahala nito.
Yan ang mandato ng HPG ipatupad ang batas trapiko at tutukan ang mga krimen – tulad ng carnapping.
Subalit bakit may mga yunit ang HPG na ginagamit na escort ng convoy na hindi naman ang Pangulo ng Pilipinas ang sakay?
For hire ba sila? Sino ang nagbabayad ng gasolina ng mga hagad na ito?
Nagtatanong lang po!