Ramdam mo na ba ang maalinsangang panahon?
Sure akong tagaktak din ang pawis mo lalo na sa pagitan ng alas onse ng umaga hanggang alas kuwatro ng hapon kung kailan tirik na tirik ang araw.
Para ma-beat ang summer heat, patok ngayong tag-init ang ice cream, soda float, milk at fruit tea bilang pamatid-uhaw.
Dito sa Tanza, Cavite, pinipilahan ng mga estudyante ang Vanilla High na nakapuwesto sa tapat ng Tanza National Comprehensive High School. Pag-aari ito ng kumpare ko at dati ring Kapuso cameraman na si Rio Cruz, kasosyo ang iba pa niyang kaibigan.
Hindi ito ang unang pagkakataon na pumasok sa pagnenegosyo si Rio. Katunayan, katabi ng Vanilla High ang kanilang J’nW Tapsi Bar. ‘Yan daw ang dahilan kaya ice cream at milk tea variations ang naisip nilang ibenta – para may ka-partner na refreshments ang snacks na ibinebenta nila sa tapsihan.
Aminado si Rio, hindi biro magnegosyo. Tabi-tabi kasi ang food stalls sa paligid ng eskuwelahan kaya mahigpit talaga ang kompetisyon. Pababaan ng presyo ang mga negosyo sa lugar. Kaya pahabaan ng pisi, kung tutuusin.
Ang pinanghahawakan ng grupo nina Rio, abot-kaya, de-kalidad at siguradong malinis ang kanilang mga produkto.
Ang ice cream, mabibili mula P14 hanggang P30, depende sa flavor at klase ng apa o cone.
Ang drinks nila, may choice ka kung tea or soda-based. May variety of flavors din na talaga namang swak ngayong tag-init. Favorite ko sa lahat ang four seasons na tea-based – saktong-sakto sa panlasa ko. Hindi matamis ang timpla, super refreshing pa dahil puno ng yelo ang baso.
Hindi hihigit sa P100 ang drinks nila. Katunayan, P39 ang pinakamura. Bukod sa maraming choices, hitik din sa promo ang Vanilla High kaya talaga namang budget-friendly.
Wala pang isang buwan mula nang buksan ang Vanilla High, pero marami nang kilalang personalidad ang bumisita sa puwesto nina Rio. Kabilang na rito ang ilang basketball icons ng Maharlika Pilipinas Basketball League, pati na ang Dubai-based content creator na si Boy Legit.
Congrats sa negosyo, pareng Rio!