“Leadership is a privilege to better the lives of others. It is not an opportunity to satisfy personal greed.”
— Mwai Kibaki
REHASHED o luma. Nilumot na. Nakulob na sa baol . Paulit-ulit .
Walang bago ang huling patutsadahan sa pagitan ni Pangulong Bongbong Marcos at dating Pangulong Rodrigo Duterte.
Noong panahon ng kampanya , pinalutang na ni Duterte ang paggamit ng ‘cocaine’ ng isang presidential candidate. Di man niya pinangalanan , ang tinutukoy niya ay si BBM.
Buwelta rin agad si BBM at sinabi na “”I might be an addict pero pareho lang kami. Ako sa cocaine, siya sa Fentanyl.”
Humantong pa na nagpa-drug test si BBM sa St. Lukes Medical Center Global City at batay sa pagsusuri ng analyst na si Geresza Reyes at may lagda ni Dr. Ma. Cecilia Fernandez , head ng Laboratory , ang resulta NEGATIBO si BBM sa cocaine .
Mismong si dating Presidential Spokesman Vic Rodriguez , na ngayon ay nasa kampo na ng mga Duterte , ang nagpakita ng resulta sa publiko .
Kaya kung mayroon man na dapat umawat sa lumang akusasyon ni Duterte , walang iba kundi si Rodriguez .
Kaya hindi dapat tayo maaliw sa palitan ng mga akusasyon ng dalawang lider at makalimutan na ang mga totoong problema ng bansa .
Hindi nila iniinda ang araw-araw na sakripisyo ng mga Pilipino dahil mga nakakariwasa naman ang dalawang pamilya .
Huwag tayong paligaw ng kani-kanilang vlogger at troll farm at pansamantalang makalimot resulta ng politikaserye na ito .
Patuloy nating kalampagin ang pamahalaan sa mataas na presyo ng bilihin , mataas na presyo ng petrolyo , PUV modernization , mabigat na daloy na trapiko at marami pang iba .
Ang away ng mga politiko ay hindi solusyon kundi konsumisyon .
Walang Personalan.