Naglabas ng public apology ang Quezon City Police District (QCPD) sa pamilya Gibbs kasunod ng pagkalat ng video na may kaugnayan sa pagkamatay ng beteranong aktor na si Ronaldo Valdez.
Kumalat online ang video na hindi awtorisado ng pamilya Gibbs.
“We acknowledge the gravity of this lapse in judgment of some of our personnel, and we deeply regret any distress this may have caused,” pahayag ng QCPD.
Tiniyak ng QCPD na mahaharap sa kasong administratibo ang kanilang mga tauhan na sangkot sa pagkalat ng video. Napag-alaman na limang pulis ang sangkot dito.
Posible silang maharap sa mga kasong neglect of duty, grave irregularity in the performance of duty, grave misconduct in relation to Republic Act 10173 (Data Privacy Act of 2012), R.A. 10175 (Cybercrime Prevention Act of 2012), conduct unbecoming of a police officer, at grave misconduct in relation to Presidential Decree 1829 (obstruction of justice).
Maaari umanong matanggal sa serbisyo ang mga sangkot na pulis bilang maximum penalty.
Sa ngayon ay nasampahan na ng Neglect of Duty ang tatpong police officers.
Samantala, papatawan naman ng legal action sa ilalim ng Data Privacy Act of 2012 at Cybercrime Prevention Act of 2012 ang mga sibilyan na nagpakalat ng video.
“We assure you that such incidents will not be tolerated, and we are implementing stricter measures to prevent their recurrence,” ayon sa QCPD.
Hinikayat din ng QCPD ang pamilya Gibbs na magsampa ng kasong kriminal laban sa mga sangkot na indibiduwal.
(Natalia Antonio)