Sa totoo lang, masakit na sa balat ang init na dulot ng matinding sikat ng araw lalo na tuwing magtatanghali.
Higit lalong nakararanas nito ang mga kababayan nating bilad na bilad sa sikat na araw habang ginagampanan ang trabaho gaya ng traffic enfircers, street sweepers, mga pulis at sidewalk vendors.
Dahil patindi nang patindi ang init ng panahon, mas dumarami ang naitatalang heat stroke. Walang eksaktong datos pero taun-taong maraming inaatake tuwing summer season, ayon mismo sa Department of Health.
Prone sa heat stroke ang mga taong may hypertension o mataas ang blood pressure. Kaya importanteng inumin lagi ang maintenance medicines. Hangga’t maaari higit sa walong basong tubig ang inumin kada araw para manatiling hydrated.
Payo ng ilang health experts, iwasang magbilad sa araw sa pagitan ng 11am hanggang 3pm kung kailan matindi ang sikat ng araw. Kung wala namang importanteng gagawin, huwag na lang lumabas para makaiwas sa matinding init.
Magsuot ng mga preskong damit gaya ng sando at shorts. Mas piliin din ang maninipis kaysa makakapal na damit. Importanteng nakakahinga ang katawan sa mainit na panahon.
Ugaliing maligo araw-araw. Kung kaya, maligo nang higit isang bes para manatiling presko at maginhawa ang pakiramdam.
Importante ring kumain ng mga masusustansiyang pagkain. Mahalaga ring may sapat na pahinga para may lakas at sigla sa pang-araw-araw na gawain.
Para sure na healthy at happy, huwag daw kalimutang ngumiti. Sa kabila ng mga hamon ng buhay, mahalaga pa ring manatili ang pagiging masayahin nating mga Pilipino. Kilala tayo sa pagiging ‘resilient’.
Ang sa akin lang, importanteng pangalagaan ang ating pangangatawan. Huwag ding kalimutang mag-ehersisyo para manatiling malusog at malakas.