Hindi habang buhay ay mananatili tayong bata. Darating ang araw, na bawat sa atin, ay tatanda at mararanasan ang pagbagal ng bawat pagkilos at kaisipan. Ayon sa Commission on Population and Development (POPCOM), tumaas ang bilang ng mga senior citizen sa ating bansa sa nakalipas na dalawang dekada. Noong taong 2000 ay nasa 4.5 million lamang ang dami ng senior citizens sa ating bansa, ngunit nitong 2020 ay dumoble ang kanilang bilang sa 9.2 milyon.
Sa pagbibigay tulong pinansyal ng ating gobyerno sa lumulobong populasyon ng ating mga senior citizen ay ipinasa ang Republic Act No. 10868 o ang Centenarians Act of 2016 na nagbibigay ng cash gift na P100,000.00 sa mga senior citizen na aabot ng 100 taong gulang. Habang maganda ang layunin ng batas na ito, ay malayo sa katotohanan na marami sa ating mga senior citizen ang hindi na umaabot sa ganitong edad. Ayon sa United Nations, ang average life expectancy ng mga Pilipino ay 71 years old lamang, kaya marami sa ating mga senior citizen ang hindi na nakukuha ang pribilehiyong ito.
Kasalukuyan, kapapasa lang bilang isang batas ang Republic Act No. 11982 o ang pag-amiyenda sa Centenarians Act of 2016. Sa ilalim ng bagong batas, maliban sa pagkakaloob ng P100,000.00 at isang sertipiko ng pagkilala (Letter of Felicity) na matatanggap sa nasabing edad, ay makakatanggap pa ng karagdagang P10,000.00 ang mga Pilipino na aabot sa bawat edad na 80, 85, 90, at 95.
Ang pagpapalawig sa batas na ito ay bilang pagkilala at pagbibigay respeto sa ating mga pinakamamahal na mga senior citizen. Ito ay isang simbolo na dapat mahalin ang mga nakakatanda sa ating lipunan ng mga susunod na salinlahi. Hindi natin maisasakatuparan ang pagbalangkas ng batas na ito sa 19th Congress kung hindi sa pagtutulungan ng Team Revilla kasama sina Senator Ramon “Bong” Revilla Sr.; Congresswoman Lani Mercado-Revilla; AGIMAT party-list Congressman Bryan Revilla; at ang inyong lingkod. Tayo ay naniniwala na wala nang hihigit pa sa pagbibigay ng pagmamahal at respeto sa ating mga nakakatanda na humubog sa ating kamalayan, na hindi kailanman malilimutan.
Para sa ating mga mahal na senior citizens, kayo po ang laging bida! #JoloCares