Totoo ang linya sa tanyag na awitin ng Mega Star na si Sharon Cuneta, ang ‘High School Life’. Talaga namang every memory, kay ganda – high school days – exciting, kay saya!
Kahit saan pa tayo makarating, babalik at babalik pa rin tayo kung saan tayo nanggaling. Iba’t ibang karanasan na hindi kailanman malilimutan, kaya laging binabalikan.
Ngayong February 2024, ipinagdiriwang ng aking Alma Mater – Saint Augustine School dito sa Tanza, Cavite ang ika-55 founding year nito.
Taong 1969 nang itaguyod ito ng dating kura paroko sa Tanza na si (+) Msgr. Francisco V. Domingo kung saan ipinangalan niya ang eskuwelahan sa patron ng bayan na si San Agustin o mas kilala sa tawag na Tata Usteng.
Mula noon, nakilala na ang SAS hindi lang sa Tanza kundi maging sa mga kalapit bayan at lungsod sa Cavite.
Sa SAS kaming magkakapatid nagtapos ng elementary at secondary education. Pati mga tiyahin at tiyuhin namin, dito rin nag-aaral.
Kaya masasabi kong sa SAS nahulma ang aming pag-uugali. Dito rin kami natuto hindi lang magbasa’t magsulat, higit lalo ang makisalamuha sa kapwa nang may paggalang.
Maraming nabuong pagkakaibigan sa SAS. Sa katunayan, hindi lang tropahan, kundi isang pamilya ang turingan sa SAS. Kahit hindi magkaka-section at magkaka-batch, basta nagkita kahit saan – imposibleng hindi magngitian o magtanguan man lang.
Sa paglipas ng mga taon, marami na ang nagbago. May mga hindi inaasahan at biglang lumisan. Marami ang nangibang-bansa. Ang iba naman, nasa PIlipinas nga pero daig pa ang nasa abroad dahil sa sobrang ka-busyhan.
Aminin natin, kung minsan – nawawala na sa loob natin ang lumingon sa pinanggalingan.
Sa totoo lang, ang sarap balikan ng nakaraan. Ang ngiti, saya, lungkot at iyak na nagpatatag sa atin bilang mga Agustino!
Wala tayo sa kinatatayuan natin kung hindi dahil sa SAS na naging katuwang natin sa pag-abot ng mga pangarap sa buhay.
Kulang ang salitang salamat para ipaabot ang taos-puso naming pagpupugay sa SAS, sa pamunuan nito, sa mga guro noon at ngayon, mga kaklase, mga kaibigan at sa nabuong pamilya.
Mahal ka namin, SAS!