Nalusaw ang 16-point lead ng Converge, naghabol pa ng walo pero sa dulo ay ayaw patalo ang locals ni coach Franco Atienza at nabawi ang 107-99 win laban sa NorthPort sa Ninoy Aquino Stadium nitong Miyerkoles ng gabi.
Natagpas ang three-game slide ng FiberXers, inakbayan ang Batang Pier sa 3-4 card sa Group B ng PBA 49 Governors Cup elims.
“We started out quite well in the first half, but then ‘yung third quarter was our loophole in this game,” ani Atienza pagkatapos ng laro.
Na-outscore ang Converge 28-16 sa third, naibuhol pa ng NorthPort sa 71-71 papasok ng fourth.
Nagkasa ng 10-0 run ang Batang Pier para agawin ang lead 92-84 kulang 6 minutes pa.
Mula roon, tinapos ng FiberXers ang laro sa 23-5 tear para kubrahin ang ‘W’.
“It so happened that in that fourth quarter we had our resolve. We were able to get a grind out win,” dagdag ni Atienza. “We’re glad that our locals … stepped up, but more so on the defensive end.”
Kinamada nina Alec Stockton at Schonny Winston ang 21 sa 36 points ng Converge sa fourth, pamasak sa 3 of 14 shooting ni import Scotty Hopson na nagkasya lang sa 12 points pero may 14 rebounds, 6 assists.
Tumapos si Stockton ng 21 points, may 17 points at 9 rebounds si Winston na hinirang na Best Player of the Game.
Namigay ang Converge ng 39 fouls na nag-resulta sa 57 free throws ng Batang Pier, 27 dito kay Venky Jois pero 12 lang ang pumasok.
Namuno ang 24 points, 14 rebounds ni Jois sa NorthPort, may 21 at 10 si Arvin Tolentino at naka-13 si Joshua Munzon.
Pagkatapos ng laro, sa customary handshake sa midcourt ay nahagip ng camera na nagkasagutan at girian sina NorthPort governor Eric Arejola at Converge assistant coach Danny Ildefonso. Umabot pa sa aisle sa dugout ang sagutan, pero walang gustong magsalita sa magkabilang panig.
Iskor
CONVERGE 107 – Stockton 21, Winston 17, Santos 15, Hopson 12, Racal 10, Delos Santos 9, Ambohot 6, Nieto 6, Cabagnot 5, Arana 4, Andrade 2, Vigan-Fleming 0, Fornilos 0, Caralipio 0, Zaldivar 0.
NORTHPORT 99 – Jois 24, Tolentino 21, Munzon 13, Navarro 11, Jalalon 9, Nelle 7, Cuntapay 5, Amores 4, Tratter 3, Flores 2, Yu 0, Bulanadi 0, Onwubere 0.
Quarters: 29-26, 57-43, 71-71, 107-99. (Vladi Eduarte)