Wala pang nakikitang direktang koneksyon umano sa money laundering ang mga testimonya ng isang testigo na humarap sa nakaraang pagdinig ng Senado ukol sa mga alegasyon laban kay Kingdom of Jesus Christ (KOJC) founder Pastor Apollo Quiboloy.
Ito ang inihayag ni Senador Risa Hontiveros nang tanungin sa kanyang press conference nitong Lunes, Marso 18, ukol sa isyu ng money laundering na posibleng kinasangkutan umano ng KOJC.
“Baka wala pang direct link sa ngayon, unless lumabas sa testimonya pa ni Ms. Reynita o ng Anti-Money Laundering Council na dumaan `yung perang iyon na galing sa paggamit ng savings account sa mga OFW at natanggap sa mga properties na ina-administer ngayon ni (dating Pangulong Rodrigo) Duterte. Posible, hindi ko pa sigurado. Depende sa kung ano `yung magiging testimonya sa susunod na pagdinig,” sabi ni Hontiveros.
Nauna rito ay sinabi ni Hontiveros na ipapatawag sa susunod na pagdinig ng Senate committee on women, children, family relations and gender equality ang AMLC dahil sa ibinunyag ng dalawang testigo sa money laundering scheme diumano ng KOJC para kay Quiboloy.
“Well, hindi ko pa sigurado kung sapat para i-pin down sila. Pero sa susunod na pagdinig, imbitahin po namin `yung Anti-Money Laundering Council para itanong pa `yung isang sinabi ni Ms. Reynita na doon po sa Singapore ay gumagamit daw ang KOJC ng mga account ng iba-ibang tao para magpadala ng tig-P200 Singapore dollars or tig-P2,000 ba na Singapore dollars at most 2,000 dito sa Pilipinas at particular sa Davao,” sabi ni Hontiveros sa panayam ng media matapos ang pagdinig.