Hinamon ni Pangulong Ferdinand “Bongbong” Marcos ang mga ahensiya ng gobyerno para ayusin ang turismo sa bansa upang makasabay sa kompetisyon ng global tourism market.
Inihayag ito ng Pangulo sa pulong ng Private Sector Advisory Council (PSAC) Tourism Sector na ginanap sa Malacañang nitong Huwebes (Enero 18) kung saan kanilang pinag-usapan ang mga rekomendasyon para makahikayat pa ng maraming turista sa bansa.
Partikular na binanggit ng Pangulo na palakasin aniya ang sports at tourism sa Pilipinas.
“The one area that I think is easy is sports development because they (athletes) are here, we just have to make the facilities better. Also food tourism has huge potential but it is largely untapped, there’s a lot of room to improve,” wika ng Pangulo.
Kaya inatasan niya ang Department of Tourism na tingnan ang potensiyal ng sports development upang makahikayat ng mga turista at isulong din ang mga pagkain sa bansa bilang pang-akit sa turismo.
Ginawang halimbawa ni Pangulong Marcos ang Thailand na mas organisado aniya ang istraktura ng turismo tulad ng matutuluyang hotel, flight booking, driver at tour guide para maging komportable ang mga turista sa naturang bansa.
“I was talking to a friend and he said I am going to Thailand and I said why go to Thailand, go to the Philippines where it’s nicer, cheaper. But he said in the Philippines [I book] the hotel, I have to be the one to arrange for my driver. I have to be the one to arrange my tour guide, and if I want to go out of town, and then I pay each step of the way,” sabi ng Pangulo.
(Prince Golez)