Nasa limelight na naman ang Ninoy Aquino International Airport (NAIA) matapos kumalat sa social media ang video ng nagkukumpulang surot sa mga butas ng mga upuan na ginagamit ng mga pasahero sa loob ng Terminal 2 at 3.
Kung hindi pa kumalat ang video sa social media ay hindi malalaman ng mga nangangasiwa sa paliparan ang problema sa mga surot na namemerwisyo sa NAIA.
Bagamat agad kumilos ang Manila International Airport Authority para malutas ang problema, isa na namang ekis sa reputasyon ng paliparan ang insidente.
Kinakailangan pa munang may pasaherong papakin ng mga surot bago malaman ng mga nangangasiwa sa NAIA na mayroon palang problemang ganito.
Nakakatawa lang ang depensa ng Pest Control Services Operations ng paliparan na posibleng galing sa ibang bansa ang mga surot na sumipsip sa dugo ng maraming pasahero.
Malinaw na may natutulog sa pansitan dahil hindi alam na may mga surot pala ang mga upuan, at ngayon lamang umaksiyon dahil mayroong mga pasaherong naperwisyo.
Bagamat nagpalit na ng mga bagong upuan ang NAIA sa dalawang terminal, hindi agad-agad makakalimutan ng mga pasahero dayuhan man o lokal ang insidente at nakatatak na ang negatibong impresyon na ang pambansang paliparan ng Pilipinas ay mayroong surot!
Nakakabangon na ang NAIA sa dating negatibong bansag na isa sa “worst airport” sa buong mundo pero heto na naman at hot item dahil sa isyu ng surot.
Marahil ay wake-up call ito sa mga nangangasiwa sa paliparan upang maging alisto at masigurong maayos na namamantini ang mga simpleng kagamitan para sa mga pasahero.
Walang sino man ang may gusto na kagatin ng surot at lalong walang mga ahensiya ng gobyerno na gustong mapahiya sa mga Pilipino at mga dayuhang bisita lalo na at ang NAIA ang pintuan ng Pilipinas para sa mga nais bumisita sa bansa.
Ang paliparan ay para ring bahay na dapat inaalagaan, nililinis mabuti upang mapanatili ang kalinisan at kung aatakehin man ng mga pesteng insekto, mapa-surot man `yan, langgam o daga, dapat ginagawan agad ng paraan upang hindj kahiya-hiya sa mga bisita.
Bukod sa surot may mga naispatan din umanong ilang daga sa loob ng paliparan kaya kilos-kilos mga utaw konting sigasig para matuwa naman sa inyo ang taongbayan!