Pasiklab si Diana Mae ‘Tots’ Carlos ng career-record 31 points nang boldyakin ng Creamline ang Akari, 25-22, 21-25, 25-22, 25-18, sa 8th Premier Volleyball League 2024 3rd All-Filipino Conference eliminations Huwebes ng gabi sa PhilSports Arena.
Trinabaho niya ang makinang na niladlad sa prinodyus na 30 markers sa likod ng impresibong 55% attack rate na may 1 ace para ibilang ang Cool Smashers sa quadruple-tie sa liderato sa malinis na 2-0 baraha.
Kumawala ang defending champions mula sa gitgitang third set at dinomina ang fourth & final stanza para tablahan sa tuktok ang PLDT Homer Fibr, Chery Tiggo at Choco Mucho sa liga na inoorganisa ng Sports Vision.
“Natutuwa ako kasi napakaganda ng laro at sakto lang talaga na yung situation na ganun, so masaya lang ako na pinagseserbisyuhan si coach Sherwin (Meneses),” litanya ni Carlos na produkto ng UP Lady Maroons.
“Pero, lagi naman kaming ready. Lagi ko namang sinasabi na kung hindi dahil sa tiwala ng teammates, ng coaches, ng management, ‘di naman talaga kami mag-e-excel ng ganito so nagpapasalamat po ako sa lahat ng suporta. Lalong lalo sa fans sa lahat ng suportang binibigay nila sa amin.”
Sumukli si Jema Galanza ng 15 points, may 8 si Alyssa Valdez at 7 si Pangs Panaga samantalang umiskor ng lima ang ‘nabinyagang’ si Bea de Leon sa Creamline sa dalawang stanza na salang sa pagputong sa Power Chargers ng ikalawang semplang.
Dehins kinaya ng 14 puntos ni Fifi Sharma ang Akari. Maging ng 13 ni Dindi Manabat-Santiago at 10 ni Grethcel Soltones.
(Armando Miguel Dumlao)