GA-BATYA ang tingin ni Luka Doncic sa basket ng State Farm Arena sa Atlanta.
Nagliyab ng franchise-record 73 points si Doncic para solo-katawan na balikatin ang Dallas Mavericks sa 148-143 panalo kontra Hawks nitong Biyernes.
Sa first half lang ay naka-41 points na si Doncic at madali nang binura ang dati niyang personal-best at team record 60.
Walang problema si coach Jason Kidd sa game plan kahit itinira ni Doncic ang 33 sa 85 attempts ng Mavs, 25 ang pumasok – walo mula sa labas ng arc.
“He is the game plan,” bida ni Kidd.
Apat na araw na ang nakakalipas, tumabo ng franchise-record ding 70 points si Joel Embiid para sa Philadelphia.
Walang naisagot ang Hawks kay Doncic na nagbaba rin ng 19 rebounds at namigay ng team-high 7 assists.
Sa nakumpletong three-point play kulang 3 minutes pa ay nakuha ni Doncic ang 70. Tinapos niya ang scoring sa isa pang and-1 para ilayo 143-136.
Inihanay ni Doncic ang pangalan sa tabi nina Wilt Chamberlain at David Thompson na mga umiskor ng 73. May 78-point game din si Chamberlain, hawak ang NBA record na 100 points.
Naka-81 points minsan si Kobe Bryant.
“Those names are special. It’s unbelievable,” bulalas ni Doncic, pinaliguan ng teammates sa locker room.
Maliban sa 21 markers ni Josh Green sa Dallas, puro Doncic na.
Kinain lahat ng 6-foot-7 guard ang defenders ng Hawks kahit nagsalitan sina Jalen Johnson, Saddiq Bey, Dejounte Murray.
Namusyaw ang 30 points ni Trae Young sa Atlanta, humugot pa ng 25 kay Jalen Johnson at 24 kay Bogdan Bogdanovic.
(Vladi Eduarte)