Umibabaw si Antonio ‘Tony’ Lascuña sa nakakasakal na tagpo sa isa pang mapagparusang araw sa The Country Club sa Sta. Rosa, Laguna, umahon sa apat na stroke na iwan at hinablot ang pamumuno kay Miguel Luis Tabuena sa hanep na pangalawang tirada sa huling butas sa TCC Invitational Huwebes.
Kulang sa tangkad pero mahaba sa talento, niladlad ng 53-anyos na Davaoeño ang katatagan at kasanayan nang iukit ang magaspang sa 72, binalewala ang mapaghamong kalagayan sa dalubhasang mga palo sa atake sa frontside at dinaig si 2016 Rio De Janeiro Olympian Tabuena sa nakakatulirong birdie sa kagila-gilalas na hambalos sa mahirap na closing hole upang ‘di makapaniwalang siya na ang nasa tuktok sa even-par 216.
Ang matapang na 3-wood second shot buhat sa 225 yards ni Lascuña naglakbay sa malakas na hangin at lumanding may 12 talampakan pa-cup. Pagkasilip sa linya para sa putt, sinalba niya ang ang 35-37 at kinumpleto ang kapansin-pansing balikwas buhat sa apat n apalong iwan sa kalahatian ng P6M tournament at paglapit sa ikalawang titulo.
“Grabe ang (golf) course. Lamang talaga dito ang long hitters pero maganda ang pitch-and-putt ko,” suma ni Lascuña, na ang binalandrang diskarte’y nagpatanaw-balik sa tagumpay 20 taon na ang nakalilipas sa Don Pocholo Razon Memorial Cup, tampok ang tiniis niyang kalidad ng laro.
Kahit binigay ang mga bentahe sa yarda sa punso kina Tabuena at Clyd Mondilla, ang kahanga-hangang mga palo ni Lascuña, kabilang ang chip-in birdie sa may ubod nang lakas na hanging par-3 No. 6 ang nagpakasa sa kanya sa mga ito.
Ang tikada ng seasoned campaigner sa mala-halimaw na 60-foot birdie putt sa par-5 No. 2 ang nagdiin sa makinang niyang araw, tinakda ang duelo kay Tabuena, na tumapos na bokya sa birdie uli sa ikalawang araw tungo sa 77-217.
Kapit sa taas si Tabuena kahit nakaapat nang birdie makaraaan ang 17 butas. Pero kinapos sa ika-18 green at sumala sa pataas-pababa mula sa 15-feet, dumausdos sa segunda mula sa dominanteng simula sa rekord 64 at manatili rin sa unahan sa second round sa 76.
“I putted the ball well but I wasn’t happy with the way I struck it (bola). My long game wasn’t to my standards,” daing Tabuena, na nag-bogey ng tatlo sa huling limang hole para sa ‘di niya akalaing 38-39.
Napasabak agad sa hamon ang two-time Philippine Open champion sa kanyang putts, nag-bogeys sa ika- at ika-9 na mga butas.
Sinamantala ni Lascuña ang pagkakataong iyon, lumapit na gumagarantiya sa isa pang rambol nila sa titulo makaraan ang ICTSI TCC Match Play Invitational noong lang November.
Ungos ang 29-anyos na si Tabuena sa makapanindig-balahibong inantala ng ulan na finale, 4&3 at binadya ang ikalawang TCC Invitational championship pagkakontrol sa torneo tapos ng 36 holes.
(Ramil Cruz)