Nagbabala si dating Senador Antonio Trillanes IV sa administrasyon ni Pangulong Ferdinand Marcos Jr. na maging maingat hangga’t nananatili sa puwesto si Vice President at Education Secretary Sara Duterte.
Sa kanyang press briefing nitong Linggo, Enero 21, ipinahayag ni Trillanes na hindi titigil si Duterte at mga kaalyado nito hangga’t hindi ito ang naging pangulo ng bansa.
Kaya kritikal umano ang midterm elections sa 2025 para sa political survival ni Pangulong Marcos.
“Itong mga darating na buwan ay kritikal para sa survival ng Marcos administration. ‘Pag umabot ng 2025 at nakuha ng mg Duterte ang mayorya sa Senado, magiging lame duck na sila (Marcoses) at alanganin na sila diyan,” babala ni Trillanes.
Sa tanong kung matatapos ba ni Pangulong Marcos ang kanyang termino hanggang sa 2028, sinabi ni Trillanes na, “Nasa peligro ang Marcos administration habang ang vice president niya ay si Sara Duterte.”
Bagamat itinanggi na nina Marcos at Duterte na mayroong alitan sa UniTeam, magkakasalungat naman ang kanilang mga kaalyado dahil sa umano’y destabilization plot laban sa administrasyon.
Sinabi ni Trillanes na nakatanggap siya ng impormasyon na tinangka ng mga kaalyado ni Duterte na ipa-impeach ang Pangulo o kumbinsihin ang militar na iatras ang kanilang suporta sa administrasyon.
“Dalawang kaharian ‘yan, Duterte at Marcos. Isa lang ang trono. Ang nakaupo sa trono ay si Marcos. Ang mga Duterte hindi sanay na wala sa poder kaya talagang maghahangad na makabalik sa puwesto,” ani Trillanes.